Usa ka pamilya gikan sa Oklahoma nga nagselebrar og birthday sa Crater of Diamonds State Park sa Arkansas ang nakakaplag og diyamante nga gibug-aton og 2.79 carats.
Sumala pa ni Raynae Madison, nanglakaw sila uban ang iyang pamilya gikan sa Cookson, Oklahoma, alang sa birthday sa iyang pag-umangkon dala ang beach digging kit ug sand sifting tools nga ilang napalit sa usa ka dollar store.
Ang Crater of Diamonds Park sa Arkansas mao ang nag-inusarang minahan sa diyamante sa tibuok kalibutan nga abli sa publiko, diin makalukat ang mga bisita ug mahimo nilang angkonon bisan unsang diyamante nga ilang makaplagan.
Human pagsala og pipila ka balde nga balas, nakabantay sila og usa ka hayag ug halapad nga bato nga gisuspetsahang dyamante.
Gidala nila ang bato sa Diamond Discovery Center sa parke, diin gikompirma sa mga eksperto nga kini usa ka 2.79-carat nga brown diamond.
Gingalanan ni Madison ang iyang nakaplagan nga diyamante og William Diamond, isip pasidungog sa iyang pag-umangkon nga nagselebrar sa iyang adlaw nga natawhan. Ang William Diamond mao ang ikatulo sa pinakadakong hiyas nga nakaplagan sa parke karong tuiga.
Photo courtesy: Texarkana Gazette
