Gisugo sa Malacañang ang tanang ahensya sa gobyerno nga ipatuman dayon ang 2024 National Disaster Response Plan (NDRP) nga naglangkob sa komprehensibong estratehiya alang sa disaster risk reduction aron paspas nga makaluwas sa kinabuhi, makahatag ug paspas nga tabang, ug mapakunhod ang kadaot sa panahon sa kalamidad.
Pinauyon sa Memorandum Circular No. 100 nga gipirmahan ni Executive Secretary Lucas P. Bersamin niadtong Setyembre 23, 2025, gitahasan ang National Disaster Risk Reduction and Management Council (NDRRMC) pinaagi sa Office of Civil Defense (OCD) nga mangulo sa pagpanguna sa implementasyon sa NDRP.
Lakip sa maong mando ang paghatag sa mga ahensya sa ilang tagsa-tagsa nga mandato aron masuportahan ang tibuok plano ug programa nga gilakip sa 2024 NDRP.
Gisugo usab sa MC 100 ang hapsay nga pakigtambayayong tali sa Presidential Communications Office (PCO) ug OCD alang sa mas lawom ug mas lapad nga pagpakatap sa impormasyon kabahin sa 2024 NDRP ngadto sa tanang ahensya sa gobyerno.
Sa dili pa dugay, girekomenda na sa NDRRMC ang pag-adopt sa 2024 NDRP nga nagtinguha sa tulo ka major nga tumong, kini mao ang pagpanalipod sa kinabuhi sa katawhan, paghatag ug paspas nga tabang sa mga apektadong komunidad, ug pagpamenos sa epekto sa mga emerhensiya pinaagi sa mas organisado ug epektibong disaster response ug early recovery operations.
Photo credit: PIA
