Kusganon nga gipanghimakak sa Armed Forces of the Philippines (AFP) ang mga malisyosong espekulasyon bahin sa giingong mga plano sa pagpalagpot sa Presidente o paghimo sa mga lakang nga maka-destabilize.
Sumala sa AFP, kining mga alegasyon walay basehanan, dili tinuod, ug layo sa kamatuoran.Ang AFP Public Affairs Office (PAO) Chief, Col. Xerxes Trinidad, niingon nga ang ilang pagkamaunongon wala magdepende sa politika o personalidad, kondili sa Konstitusyon, sa Republika, ug sa katawhang Pilipino,
Gipasalig usab sa militar nga klaro ang ilang katungdanan ang pagdepensa sa mga demokratikong institusyon sa nasud, ug dili manghilabot sa kagubot sa politika.
Gipabilin sa AFP nga sila usa ka propesyonal ug disiplinado nga pwersa, nga adunay usa ka intact ug lig-on nga kutay sa komand.
Matud pa nila nga ang mga pagsulay nga ilambigit ang militar sa mga intriga usa lamang ka pagsulay sa pagpugas og kagubot, pagguba sa pagsalig sa liderato, ug pagpahuyang sa kampanya sa Presidente batok sa korapsyon.
Gipasalig sa AFP sa katawhang Pilipino nga magpabilin silang matinud-anon sa ilang katungdanan sa konstitusyon—usa ka puwersa nga adunay mga prinsipyo ug disiplina, maunongon sa bandila, Konstitusyon, ug Republika.
Ang pagklaro sa AFP nunot sa mga taho sa planong destabilisasyon aron mapalagpot si Presidente Ferdinand Marcos Jr.
Photo courtesy to:PNA
