Dili moubos sa 14 ka tawo ang namatay ug 124 pa ang namissing human nahugno ang usa ka dekada nang lake barrier sa Hualien County, Taiwan niadtong Martes, Setyembre 23 tungod sa grabe nga pag-ulan nga gidala sa Super Typhoon Ragasa (Nando), sumala sa lokal nga panggamhanan.
Sumala sa pipila ka survivors, nahimong sama sa kusog nga baha nga puno sa lapok ang mibuhagaygikan sa lake barrier ug midiretso sa ilang mga pinuy-anan, naguba ang tulay ug naapektohan ang mga kabalayan sa Kuang Fu Township.
Gikompirma ni Lee Kuan-ting, tigpamaba sa Hualien County Government, nga 18 ang samaran samtang nagpadayon ang search and rescue operations.
Base usab sa National Fire Agency sa nasud, miabot na sa 7,600 ka tawo ang naluwas ug na-evacuate sa tibuok Taiwan tungod sa bagyo.
Kalabot niini, nagpagawas usab ang mga awtoridad og mga video nga nagpakita sa pagbaha sa pipila ka mga kalsada, paglunop sa mga sakyanan, ug pagkatumba sa mga kahoy.
Photo courtesy: Focus Taiwan
