Naangol ang 18 ka indibidwal dihang nagsugod ang kasamok atol sa protesta batok sa gobyerno sa Peru niadtong Domingo, Setyembre 21, 2025. Gatusan ka tawo ang nagtapok sa kalsada ug nakig-away sa kapulisan isip pagpakita sa ilang kasuko batok sa liderato ni Presidente Dina Boluarte.
Base sa report, ang mga demonstrador mipasiugda sa paglabay og bato ug pagpamunal, nga gibaslan sa kapulisan pinaagi sa tear gas ug rubber pellets. Apil usab sa mga naangol ang tulo ka pulis ug unom ka mamahayag.
Ang kalihokan gi-organisa sa grupo nga “Generation Z” nga kasagarang kabatan-onan ang miyembro, apan miapil usab ang uban pang grupo nga dili kontento sa kasamtangang administrasyon. Tungod niini, mas mikunhod pa ang pagsalig sa publiko kang Boluarte, nga gaatubang usab og isyu sa korapsyon ug pagdagsa sa organisadong krimen.
Gipangayo karon sa mga human rights groups ang tukmang imbestigasyon sa sobra nga paggamit og pwersa sa kapulisan. Sa laing bahin, wala pa mopagawas og opisyal nga pamahayag ang gobyerno sa Peru kalabot sa gihimo nga protesta ug sa panawagan alang sa reporma ug mas matin-aw nga pagdumala.
Photo courtesy to:Council on Foreign Relation
