Giaprobahan na sa House Budget Amendments Review Sub-Committee sa House Committee on Appropriations ang pag-realign o pagbalhin sa ₱46 bilyon gikan sa proposed budget sa Department of Public Works and Highways (DPWH) alang sa mga flood control projects sa 2026, ngadto sa duha ka nanag-unang social amelioration programs sa gobyerno.
Sumala sa Budget Amendments Review Subcommittee, ilang gisugyot ang rekomendasyon ni House Minority Leader ug 4Ps party-list Rep. Marcelino Libanan nga ibalhin ang ₱32.6 bilyon ngadto sa Assistance to Individuals in Crisis Situations (AICS) sa Department of Social Welfare and Development (DSWD), ug ₱14.82 bilyon ngadto sa Tulong Panghanapbuhay sa Ating Disadvantaged/Displaced Workers (TUPAD) sa Department of Labor and Employment (DOLE).
Ang realignment gisundan sa pahayag ni President Ferdinand “Bongbong” Marcos Jr. nga walay bag-ong pondo nga igahin alang sa mga flood control projects sa 2026.
Sa ilawom sa gisugyot nga ₱6.7-trilyon nga national budget, sobra sa ₱250 bilyon ang orihinal nga gi-allocate alang sa flood control ilawom sa DPWH.
Apan, ang dakong bahin niini gibalhin ngadto sa mga programa nga diretso nga makatabang sa mga kabus ug mga displaced workers.
Sumala kang House Minority Leader Marcelino Libanan, mas maayo nga igahin ang pondo sa mga programa nga dali makatubag sa panginahanglan sa mga tawo, labi na sa tunga sa krisis sa panginabuhian.
Ang AICS program naghatag og pinansyal nga tabang alang sa mga indibidwal nga anaa sa emergency situations, sama sa pagkasakit, aksidente, o kalamidad.
Samtang ang TUPAD usa ka emergency employment program alang sa mga nawad-an og trabaho o anaa sa informal sector.
Photo courtesy of leytesamardailynews.com
