Miabot na sa halos 63,000 ka illegal gambling websites ang na-take down sa Department of Information and Communications Technology (DICT) uban sa Cybercrime Investigation and Coordinating Center (CICC) ug National Telecommunications Commission (NTC).
Sa kinatibuk-ang ihap, dul-an 9,000 niini ang mga kasagarang illegal gambling sites, samtang sobra sa 54,000mil ang illegal online sabong websites nga na-take down sukad nga gidili kini sa kasamtangang administrasyon.
Tungod niini, gilunsad sa Digital Pinoys ang usa ka plataporma diin pwede makareport ang publiko kabahin sa mga illegal gambling websites ug kalabot sa mga kalihokan.
Nunot niini abli na ang digitalpinoys.org/notoillegalgambling alang sa mga gustong mosumbong og mga illegal online gambling sites, advertisement, o mga personalidad nga nag-promote sa maong kalihokan.
Gisiguro sa grupo nga magpabiling anonymous ang tanang sumbong ug dali kining tagdon sa mga otoridad.
Samtang, gibutyag usab sa grupo nga base sa monitoring sa mga ahensya 20 ka verified social media pages ang nadetek nga nag-endorso og illegal gambling upat niini ang na-take down na.
Gawas pa niini, gi-imbestigahan karon ang 29 ka social media influencers nga posibleng nalambigit sa promosyon sa mga illegal nga gambling platform.
Padayon usab ang panawagan sa grupo sa publiko nga makig-uban sa kampanya batok sa illegal online gambling pinaagi sa aktibong pagreport gamit ang ilang plataporma.
Photo courtesy to:asia gaming brief
