Nangayo ug hustisya ang pamilya ni Ricarte Bayawan, human nakabsan sa kinabuhi tungod sa pagpamusil sa Barangay Sudapin, Kidapawan City, niadtong Oktubre 24.
Nagpabiling pangutana ang hinungdan sa krimen, ilabi na kay wala kunoy daang rekord ang biktima sa barangay. Giklaro usab sa impormasyon nga bisan nagpuyo ang pamilya isip informal settlers sa usa ka pribadong yuta, adunay gihimong mediation ang barangay tali sa mga hingtungdan.
Sa nahitabo, migawas sa ilang balay si Bayawan sa Purok 6B dihang giatake sa duha ka lalaki nga sakay sa motorsiklo. Naigo siya sa tulo ka bala sa dughan gikan sa kalibre .45 nga armas.
Bisan nadala pa sa iyang anak ngadto sa ospital, namatay gihapon ang senior citizen. Wala pay matino nga motibo sa pagpamusil, busa ang pamilya naglaom nga makab-ot ang hustisya ug madiskobrehan ang tinuod nga hinungdan sa pagpatay.
