Nagpadayon ang pagsaka sa export sa Pilipinas niadtong Hulyo 2025, nga mitaas og 17.3 porsyento ngadto sa USD7.34 bilyon gikan sa USD6.25 bilyon sa samang bulan niadtong miaging tuig, sumala sa Philippine Statistics Authority. Kini na ang ikapito nga sunod-sunod nga bulan nga mitubo ang export.
Sa unang pito ka bulan, miabot na sa USD48.62 bilyon ang total exports, mas taas og 13.9 porsyento kaysa USD42.69 bilyon sa samang panahon sa 2024. Ang electronics exports misaka og 24.5 porsyento ngadto sa USD3.92 bilyon tungod sa kusog nga demand sa semiconductors.
Matod ni Trade and Industry Secretary Cristina Roque, ang pagsaka sa electronics ug mineral exports nagpakita sa kusog sa mga negosyo sa Pilipinas bisan pa sa lisod nga global trading environment. Gisaad usab niya nga padayon ang DTI sa pagpangita og mas lapad nga merkado alang sa exporters.
Ang US ang pinakadakong merkado sa exports sa Pilipinas (15.8%), gisundan sa Hong Kong (15.2%), Japan (13.6%), China (11.3%), ug Netherlands (4.3%). Matod ni DTI-Export Marketing Bureau Director Bianca Pearl Sykimte, aktibo silang nagpalapad sa Europe, ASEAN, ug Middle East pinaagi sa trade promotions, business-matching programs ug online platforms.
SOURCE: PNA
