Mihangyo og P3.8 bilyones nga budget para sa tuig 2026 ang Department of Energy (DOE) kung diin 24.44% ang taas kaysa P3.1 bilyones sa 2025.
Lakip sa maong sugyot ang P500 milyones alang sa kinatibuk-ang electrification project ug P6.4 bilyones alang sa national rural electrification program, isip pagsuporta sa tumong ni Presidente Ferdinand Marcos Jr. nga makab-ot ang 100% nga elektripikasyon sa dili pa matapos ang iyang termino.
Tumong usab sa maong budget nga mapausbaw ang limpyo nga enerhiya sa nasud. Ang Renewable Energy Development Program makadawat usab og P198 milyones (usa ka pagtaas sa 15.7%) ug ang Alternative Fuels and Energy Technology Program, nga nagtutok sa electric vehicles, LPG, ug CNG, makadawat og P460 milyones.
Target sa DOE nga maabot ang 35% nga bahin sa renewable energy sa power mix sa nasod sa tuig 2030.
Samtang, ang House Committee on Appropriations niadtong Martes, Septiyembre 2, daling mi-aprobar sa gisugyot nga P3.8 bilyones nga budget sa DOE alang sa tuig 2026, human ang deliberasyon sulod lang sa pipila ka minuto.
Ang paspas nga proseso subay sa tradisyon sa Kamara nga dili ipailawom sa taas nga vetting ang mga kanhi kongresista nga karon sakop na sa Gabinete, sama kang DOE Secretary Sharon Garin, kanhi representante sa Iloilo, kinsa maoy kasamtangang nangulo sa ahensya.
Photo Courtesy to: Power Philippines
