MALAYBALAY CITY- Patay ang usa ka driver human nabanggaan ang gimanihoang motorsiklo sa Suzuki Multicab, samtang naangol ang iyang angkas nga asawa didto sa Barangay Road, Purok-3, Barangay Linabo dakbayan sa Malaybalay alas 12:15 Hulyo 13, 2025.
Ang nalambigit nga Yamaha Motorcycle (MC), kolor maroon, gimaneho ni alyas βErnestβ 62 anyos, minyo, ug residente sa P-6, Kulasi, Lantapan
Samtang ang Suzuki Multicab, gimanehoan ni Mark Louie Abunda Bentillo, 40 anyos, minyo, ug residente sa P-1, Linabo sa dakbayan.
Base sa imbestigasyon sa Malaybalay City Police Station, ang motorsiklo paingon unta sa Lantapan gikan sa Sitio Lalawan, samtang ang sakyanan naggikan sa pikas direksyon padulong sa sentro sa Malaybalay dihang pag-abot sa usa ka car wash station, misulod sa linya sa motorsiklo ang kasugat nga Multicab hinungdan sa panagbangga.
Tungod sa kusog nga impact, nalabay ang magtiayon gikan sa motorsiklo ngadto sa konkreto nga car wash area, samtang ang pick-up mihunong daplin sa karsada.
Daling girespondihan sa Malaybalay Emergency Response Unit (MERU) ang mga biktima ug gidala sa Bukidnon Provincial Hospital, apan ang driver sa motorsiklo gideklarang dead on arrival sa attending physician samtang ang iyang asawa nga si alyasβEveβ, 62 anyos, naangol ug padayon nga giatiman sa mga doktor.
Walay samad ang driver sa multicab nga si Bentillo ug anaa na sa kustodiya sa Malaybalay City Police Station kauban ang sakayanan alang sa tukmang disposasyon.
