Nanawagan si Senador Alan Peter Cayetano sa gobyerno nga hangyoon ang International Criminal Court (ICC) nga temporaryong buhian si kanhi Presidente Rodrigo Duterte ug ipaubos siya sa βhouse arrestβ samtang naghulat sa husay.
Sa resolusyon nga gisang-at ni Cayetano, giingon nga ang temporaryo nga pagpagawas sa 80-anyos nga si Duterte kinahanglan tugutan base sa humanitarian grounds.
Matod niya nga kinahanglang hatagan og katungod ang kanhi presidente nga isipon nga inosente hangtod nga mapamatud-an nga sad-an base sa balaod sa Pilipinas ug internasyonal.
Usa sa mga sugyot sa resolusyon mao ang pakig-coordinate sa ICC nga ibalhin si Duterte sa Philippine Embassy sa The Hague, Netherlands, ug didto ibutang siya ubos sa usa ka matang sa house arrest, modified house arrest, o bisan unsa nga kahikayan nga angay sumala sa desisyon sa korte.
Siya miingon nga kini nga kahikayan kinahanglan nga motuman sa bisan unsang mga kondisyon nga ang Pre-Trial Chamber mahimong ipahamtang, sama sa pagpabilin sa usa ka pinuy-anan, pagdili sa pagkontak sa mga biktima o mga saksi, ug pagsunod sa mga tawag sa korte.
Gihisgotan usab sa resolusyon ang dili maayong kahimtang sa panglawas ni Duterte, tungod sa iyang katigulangon ug dugay nga pagkahimulag sa pamilya
Gipasidan-an niini nga ang iyang pisikal ug emosyonal nga kaayohan mahimong maapektuhan pag-ayo kung magpabilin siya sa prisohan.
Nanawagan usab kini alang sa kalooy ug hinanaling aksyon, nga nagpahayag nga ang paghatag kang Duterte og higayon nga makauban ang pamilya ug mga higala sa iyang katapusang mga tuig usa ka yano nga porma sa dignidad ug ang pagdumili kaniya usa kini ka porma sa inhustisya.
Upat ka bulan na sa kustodiya sa ICC si Duterte human siya gidakop sa Interpol niadtong Marso 11, 2025, sa iyang pagbalik gikan sa Hong Kong.
Gidakop siya pinasikad sa warrant of arrest sa ICC alang sa mga krimen batok sa katawhan ug gidala dayon sa The Hague, Netherlands diin siya gitanggong sa pagkakaron.
