Aktibong nakigduyog ang National Commission on Indigenous Peoples (NCIP) Davao Oriental Provincial Office sa selebrasyon sa ika-4 nga Panaggubuk agig pagtimaan sa National Indigenous Peoples Month didto sa Student and Activity Center, Davao Oriental State University (DOrSU) Main Campus, Mati City niadtong milabay nga adlaw.
Ang maong kalihokan adunay tema nga “Honoring Our Roots, Strengthening Our Identity.”, diin gipasiugda ang kultura sa mga Indigenous Peoples ug gipalig-on ang garbo sa kultura, ug gidasig ang mga estudyante ug mga batan-ong Indigenous Peoples nga dawaton ug ipasigarbo ang ilang identidad ug kabilin.
Samtang mipadayag ug pagpasalamat si Provincial Officer Julius L. Mabini, ngadto sa DOrSU ug sa mga nag-organisa sa maong kalihokan, diin nahatagan sila og higayon nga mapaambit ang ilang kultura.
Kalabot niini, gipasalig sa NCIP nga padayon ang ilang pagpanalipod sa mga katungod ug kaayohan sa Indigenous Cultural Communities/Indigenous Peoples sa probinsya.
Photo courtesy: NCIP DavOr
