Tulo pa ka biktima ang miila sa 43-anyos nga kanhing overseas Filipino worker (OFW) nga si Karena Arguelles, kinsa gidakop tungod sa giingong pagpangawat og pitaka nga adunay mga credit card, sumala sa Mabolo Police Station.
Miadto ang mga biktima sa estasyon sa pulis, usa ka adlaw human gidakop si Arguelles tungod sa paggamit sa credit card nga dili iya sa pagpalit og tambal nga nagkantidad og ₱21,000 sa usa ka botika sa Barangay Apas, Cebu City.
Matod sa kapulisan, iya sa usa ka babayeng abogado sa Dakbayan sa Sugbo ang credit card. Nakadawat kini og one-time password (OTP) sa iyang cellphone ug dihadiha gikontak ang botika human nahibaloang gigamit ang nawala niyang kard.
Gipahibalo sa pagdumala sa botika ang ilang security personnel, nga misangpot sa pagkadakop ni Arguelles. Gikataho nga miangkon si Arguelles sa paggamit sa kard, apan miingon nga gisugo lang siya sa usa ka higala sa pagpalit og tambal baylo sa kuwarta.
Photo Courtesy: PNP Cebu City Police Office
