Nadakpan sa kapulisan ang usa ka most wanted person sa nasud atol sa intelligence-driven law enforcement operation nga gipahigayon sa Barangay San Isidro, Talakag, Bukidnon, alas 9:30 sa gabii niadtong Oktubre 15, 2026.
Ang dinakpan usa ka hamtong nga lalaki, ug residente sa Barangay Labrador, Buug, Zamboanga Sibugay. Siya ang giila nga usa sa mga national-level most wanted person nga gilista sa Department of the Interior and Local Government o DILG, ug apil usab sa Top 10 municipal-level most wanted person pinaagi sa electronic warrant.
Gipahigayon ang operasyon sa mga personahe sa Buug Municipal Police Station, kauban ang Intelligence and Special Operations Division ug ubang mga yunit sa kapulisan, pinasikad sa warrant of arrest batok sa suspek tungod sa tulo ka kaso sa statutory rape ubos sa Article 266-A, paragraph 1, sa Republic Act 8353. Ang mga kaso girehistro ubos sa Criminal Case Numbers IM-22-2633, IM-22-2634 ug IM-22-2635, nga giisyu sa Regional Trial Court Branch 31 sa Imelda, Zamboanga Sibugay, niadtong Septyembre 5, 2022. Walay rekomendadong piyansa alang sa maong mga kaso.
Sa pagkakaron, anaa na sa kustodiya sa Buug Municipal Police Station ang dinakpan alang sa hustong disposisyon sa iyang kaso. Gipasiugda sa kapulisan ang padayong paningkamot sa pagdakop sa mga wanted person ug pagpatuman sa balaod aron mapalig-on ang kalinaw ug kaluwasan sa komunidad.
