Gimandoan ni Cebu City Mayor Nestor Archival ang mga barangay nga hugtan ang pagmonitor sa mga molupyo nga magdaob og basura ug dakpon ang mga masakpang molapas sa balaod.
Gihimo kini tungod sa gikabalak-ang kalidad sa hangin sa dakbayan, nga giklasipikar sa Environmental Management Bureau (EMB) nga “very unhealthy.”
Gikwestiyon ni Archival ang pag-ingon nga lokal lamang nga aso ug hugaw ang hinungdan sa kahimtang sa hangin. Matod niya, posibleng nakatampo usab ang mga sunog sa kalasangan sa Indonesia.
Samtang, mangayo ang kagamhanan sa dakbayan sa Department of Environment and Natural Resources (DENR) og smoke belching machine aron masusi ang mga sakyanan nga sobra ang pagpagawas og aso, ilabi na ang mga truck nga naggamit og krudo.
Pinaagi niini, gilaoman sa dakbayan nga mas mapalig-on ang pagpatuman sa mga regulasyon batok sa polusyon ug mapanalipdan ang kahimsog sa publiko.
Photo Courtesy: NLEXpress/Wordpress.com
