Gipalig-on sa Philippine National Police (PNP) ang mga operasyon batok sa human trafficking, ilabina sa mga ilegal nga kalihokan nga gihimo pinaagi sa internet.
Kini human gimandoan ni PNP Chief Police General Jose Melencio Nartatez Jr. ang tanang yunit sa kapulisan nga palig-onon ang operasyon ug hugot nga bantayan ang mga lugar nga posibleng gigamit sa maong kalihokan.
Ang direktiba gisunod sa pagpagawas sa 2026 Trafficking in Persons Report sa United States Department of State, diin gikumpirma nga napabilin sa Pilipinas ang Tier 1 status niini batok sa human trafficking sa ika-11 nga sunod-sunod nga tuig.
Bisan pa niini, gitumbok sa report ang panginahanglan nga pauswagon pa ang imbestigasyon ug pagsang-at sa kaso, digital forensic capabilities, ug pag-ila ug pagpanalipod sa mga biktimang gipahimuslan sa mga online scam operation.
Tungod niini, gimandoan ni Nartatez nga paspason ang pagbansay sa mga imbestigador nga nagdumala sa mga kaso sa human trafficking nga nalambigit sa cybercrime.
Lakip sa pagbansay ang pagpangolekta sa digital evidence, pagsubay sa cryptocurrency ug pag-analisar sa mga transaksiyong pinansyal online nga may kalabotan sa mga sindikato sa human trafficking.
