Napalgan ang usa ka bag-ong himugso nga batang lalaki nga gibilin sa likod sa usa ka balay sa Purok 5, Barangay Maug, Butuan City, pasado alas 12:00 sa sayong kaadlawon.
Sumala sa tag-iya sa balay nga si Solpecio Catarman, 69 anyos, nakurat sila human makadungog og tingog sa usa ka bata gikan sa likod sa ilang balay, duol sa tangkal sa baboy.
Dali nilang gisusi ang maong dapit ug didto nadiskobrehan ang bag-ong himugsong bata. Human niini, nangayo sila og tabang sa ilang mga silingan ug mga opisyal sa barangay.
Sa pagkakaron, luwas na ang bata ug gidala sa Butuan Medical Center o BMC alang sa pag-atiman sa iyang kahimtang.
Samtang, padayon pang gisuta sa mga otoridad kung kinsa ang responsable sa pagbilin sa maong bata ug unsa ang mga sirkumstansiya nga mitultol sa maong insidente.
