Gihatagan og pag-ila ang serbisyo ug dedikasyon sa mga Barangay Health Worker (BHW) sa Agusan del Norte atol sa BHW Summit 2026 nga gipahigayon sa Provincial Government Covered Court, Capitol Compound, dakbayan sa Butuan.
Misalmot sa maong kalihokan si Agusan del Norte Governor Maria Angelica Rosedell M. Amante kauban ang mga BHW gikan sa nagkalainlaing lungsod sa probinsya.
Tumong sa summit nga ilhon ang kontribusyon sa mga BHW sa paghatag og batakang serbisyo panglawas ug pagtabang sa mga residente sa ilang tagsa-tagsa ka komunidad.
Gipahigayon ang kalihokan ubos sa temang “LEAD. SERVE. NAVIGATE. Together for a Healthier and Resilient Agusan del Norte,” nga nagpunting sa papel sa mga BHW sa pagpalambo sa kahimsog sa katawhan ug pagpalig-on sa mga serbisyo panglawas sa probinsya.
Pinaagi sa ilang direktang pag-alagad sa komunidad, nahimong importante nga kaabag ang mga BHW sa pagpaabot sa impormasyon ug batakang serbisyo panglawas ngadto sa mga residente, ilabina sa mga barangay.
