Nagtala og 33.6 porsiyentong pagsaka ang kasagarang presyo sa humay nga nadawat sa mga mag-uuma sa nasud niadtong Septiyembre karong tuiga, kon itandi sa samang bulan sa miaging tuig, sumala sa datos sa Philippine Statistics Authority (PSA).
Base sa taho, miabot sa P20.84 kada kilo ang farmgate price sa humay niadtong Septyembre. Bisan pa niini, mas ubos kini kumpara sa P22.16 kada kilo niadtong Agosto karong tuiga. Sa laing bahin, mas taas gihapon ang kasamtangang presyo kon itandi sa P15.60 kada kilo nga natala niadtong Septyembre sa miaging tuig.
Sa pagtandi sa mga rehiyon, Central Visayas ang nagtala sa kinatas-ang presyo nga P24.60 kada kilo, samtang ang MIMAROPA ang adunay pinakaubos nga presyo sa P18.85 kada kilo.
Sumala sa PSA, positibo ang pagtubo sa presyo sa humay sa tanang rehiyon sa nasud, gawas sa Bangsamoro Autonomous Region in Muslim Mindanao (BARMM).
Photo courtesy:DA
