Nadakpan sa buy-bust operation, ang usa ka giila sa kapulisan nga High-Value Individual (HVI) nga giilang alyas “Ritz,” 31 anyos, ulitawo ug walay trabaho didto sa Zone 6, Barangay San Jose, Palo, Leyte niadtong nakalabay nga adlaw.
Ang operasyon gipahigayon sa Palo Municipal Police Station (MPS), ubos sa pagpangulo ni PMAJ Gwen Alison C. Corregidor, Officer-in-Charge, inubanan sa Regional Intelligence Unit 8 (RIU8), ubos sa pagdumala ni PCOL Celerino M. Sacro Jr., Provincial Director sa Leyte Police Provincial Office (LPPO).
Narekober sa operasyon ang tulo ka heat-sealed transparent plastic sachet nga adunay gidudahang shabu, nga may kinatibuk-ang gibug-aton nga 6.33 gramos ug gibanabanang kantidad nga ₱43,044. Nakuha usab ang buy-bust money, usa ka sling bag, usa ka kalibre .22 nga rifle ug upat ka bala. Ang mga ebidensiya gimarkahan, giimbentaryo ug gikuhaan og litrato diha mismo sa lugar sa pagkadakop, atubangan sa suspek ug sa gikinahanglang mga saksi, lakip ang usa ka napiling opisyal sa barangay ug representante sa Department of Justice (DOJ).
Gidala ang suspek ug ang mga nakumpiskang ebidensiya sa Palo MPS alang sa dokumentasyon ug hustong disposisyon. Ang mga gidudahang droga gisumite sa Regional Forensic Unit 8 (RFU8) alang sa chemical analysis. Giandam na usab ang kasong kriminal batok sa suspek tungod sa gituohang paglapas sa Section 5 (pagbaligya og ilegal nga droga) ug Section 11 (pagbaton og ilegal nga droga) sa Article II sa Republic Act No. 9165 o Comprehensive Dangerous Drugs Act of 2002.
Photo courtesy: PNP LPPO
