Gipalig-on sa lokal nga pangagamhanan sa Mawab ang kahibalo sa mga opisyal sa munisipyo bahin sa kaluwasan ug kahimsog sa trabaho pinaagi sa pagpahigayon og Occupational Safety and Health (OSH) Training.
Nitambong sa maong pagbansay ang mga department head ug section head sa munisipyo, nga nagtumong sa pagpalalom sa ilang pagsabot sa mga sumbanan sa kaluwasan ug sa paglikay sa posibleng peligro ug aksidente sulod sa trabahoan.
Gipangunahan sa Provincial Local Government Unit sa Davao de Oro ang maong kalihokan ubos sa suporta ni Gobernador Engr Raul Mabanglo, nga gipasalamatan sa LGU Mawab.
Ubos sa administrasyon ni Mayor Myrill Apit, MPA, padayon ang pagpatuman sa mga programa nga nagtutok sa kaayohan sa mga kawani ug sa pagpalambo sa serbisyo publiko.
Tumong sa maong pagbansay nga mapalambo ang luwas ug hapsay nga palibot sa trabahoan , diin mapanalipdan ang mga empleyado samtang naghatag og serbisyo ngadto sa mga katawhan.
