Gipalig-on ang kaandam sa komunidad sa Monkayo, Davao de Oro sa pag-atubang sa mga kalamidad ug emerhensiya pinaagi sa Community-Based Resiliency Management Training (RMT) Program nga napahigayon sa Monkayo Dome.
Nakatambong sa maong pagbansay ang 241 ka partisipante nga nagrepresentar sa nagkalainlaing purok sa lungsod. Gisugdan ang kalihokan niadtong Oktubre 13 ug magpadayon hangtod Oktubre 14, 2026.
Gipangunahan sa Provincial Government of Davao de Oro ubos ni Governor Engr Raul Mabanglo, pinaagi sa Provincial Disaster Risk Reduction and Management Office (PDRRMO), ang nasangpit nga programa sa pakigtambayayong sa lokal nga pangagamhanan ubos ni Mayor Manuel Jayr N. Zamora Jr.
Tumong sa pagbansay nga mapalambo ang kahibalo ug kahanas sa mga representante sa matag purok sa pagpangandam ug epektibong pagresponde sa mga kalamidad aron masiguro ang kaluwasan ug mapanalipdan ang kinabuhi sa mga residente.
Photo courtesy: Municipality of Monkayo
