Nadakpan sa mga otoridad ang 45-anyos nga lalaki nga gitudlong High Value Individual human sa gilunsad nga buy-bust operation sa Purok 1, Barangay Central Poblacion, Kalilangan, Bukidnon niadtong nakalabay nga adlaw.
Ang maong operasyon gipahigayon sa hiniusang pwersa sa Kalilangan Municipal Police Station Drug Enforcement Unit, 2nd Bukidnon PMFC, Provincial Intelligence Unit, ug 1004th RMFB.
Nakuha gikan sa posisyon sa suspek ang tulo ka heat-sealed transparent plastic sachet sa gituohang shabu nga nagtimbang og 96.76 gramos ug gibanabana nga nagkantidad og ₱657,968.00. Apil usab sa nakumpiska ang usa ka android cellphone, belt bag, usa ka yunit sa Yamaha NMAX nga motorsiklo uban ang yawe niini, ₱200 nga proceeds money, ug ₱1,000 bill nga gigamit sa operasyon.
Gidala na ang nakumpiskang ebidensya sa Bukidnon Provincial Forensic Unit alang sa qualitative ug quantitative nga eksaminasyon. Sa karon, ang suspek anaa na sa kustodiya sa Kalilangan MPS alang sa dokumentasyon ug saktong disposisyon samtang giandam na pasakaan sa kasong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002
