Nangandam na ang Local Disaster Risk Reduction and Management Office (LDRRMO) sa lungsod sa Manolo Fortich batok sa posibleng hulga ug epekto sa El Niño, ilabina sa krisis sa kakulang sa tubig, hulaw sa pananom, ug ang risgo sa sunog.
Sa pakighinabi sa Juander Radyo Malaybalay kang LDRRM Officer Ronel Alemania, iyang gipahayag nga padayon ang ilang gihimong pagpabilin nga updated sa mga advisory sa PAGASA samtang gipalambo ang ilang preparedness ug contingency plans. Gitutokan usab sa ilang buhatan ang suod nga koordinasyon tali sa BFP, PNP, ug sa sektor sa agrikultura aron masiguro ang kaandam sa mga barangay response teams diha sa komunidad.
Aron malikayan ang mas dakong krisis sa tubig, giawhag ni Alemania ang mga residente nga magdaginot ug likayan ang pag-usik-usik sa suplay sa tubig, ug girekomendar usab ang pag-imbak ug tubig-ulan kon mag-ulan
Alang sab sa mga mag-uuma nga direktang maapektuhan sa hulaw, gitambagan sila nga makisayod sa Municipal Agriculture Office aron mahibal-an ang mga tanom nga mas makasugakod sa panahon sa kainit ug gamayng pag-ulan, samtang gipahimangnuan ang tanan nga magpabiling mabinantayon sa mga opisyal nga pahibalo sa kagamhanan.
Photo courtesy: LGU – Manolo Fortich
