Makadawat og 60 pesos kada adlaw nga wage subsidy gikan sa gobyerno ang mga small ug medium enterprises o SMEs nga maglisod sa pagpatuman sa bag-ong minimum wage increase.
Sumala sa Malacañang, ilunsad sa Department of Labor and Employment o DOLE ang Sagip Trabaho Program aron malikayan ang pagtangtang sa mga empleyado ug pagsira sa gagmay nga negosyo.
Ang subsidy ipatuman sulod sa tulo ka bulan, gikan Oktubre hangtod Disyembre. Aron mahimong kwalipikado, kinahanglan magsumite ang mga negosyo sa DTI certificates, financial records ug listahan sa mga empleyado pinaagi sa online portal o sa DOLE regional offices.
Matud sa Palasyo, ang programa may kalabotan sa P60 nga pagtaas sa minimum wage sa National Capital Region, diin ang minimum wage mahimong 755 pesos alang sa non-agricultural workers ug 718 pesos alang sa agricultural ug small retail establishments.
Gibanabana nga mokabat sa 1.1 milyon ka mga trabahante sa NCR ang makabenepisyo sa wage increase.
Photo courtesy: PCO/DOLE
