Nagpatuman og temporaryong ban ang Department of Agriculture (DA) sa pag-angkat sa binuhing baka, beef products ug animal protein gikan sa United Kingdom.
Lakip sa naapektuhan ang mga produkto gikan sa UK human adunay nakumpirmang kaso sa bovine spongiform encephalopathy (BSE) nga mas nailhan isip mad cow disease, sa North Ayrshire, Scotland.
Ang ban gipatuman pinaagi sa Department Circular 50 nga gipirmahan ni Agriculture Secretary Francisco Tiu Laurel Jr. niadtong Septiyembre 21.
Tungod niini, gisuspinde sa DA ang pagproseso ug pagpagawas sa Sanitary and Phytosanitary Import Clearances alang sa mga baka ug ug uban pang may kalabutan nga mga produkto gikan sa UK.
Matud sa DA, gihimo ang maong lakang aron mapugngan ang posibleng pagsulod sa bovine spongiform encephalopathy sa nasod.
Gimandoan usab ang mga veterinary quarantine officer sa mga pantalan ug tugpahanan sa tibuok nasod nga magpatuman og mas higpit nga inspeksyon sa mga kargamento nga mosulod sa Pilipinas.
Photo courtesy: Our steak Range
