Giklaro sa Mines and Geosciences Bureau Region X o MGB-10 nga prayoridad niini ang pagpanalipod sa katungod sa mga Indigenous Peoples o IPs sa paggamit ug pag-ugmad sa ilang ancestral lands sa Awang, Opol ug Manticao, Misamis Oriental, ilabina sa small-scale mining nga nahimong usa sa ilang panginabuhian.
Kini human mapirmahan ang unang Interim Small-Scale Mining Contract alang sa nahisgutang mga lugar.
Matud ni OIC DENR-MGB-10 Regional Director Engr. Alvin S. Requimin, ipahigayon ang mga training ug capacity-building activities alang sa mga IPs aron masiguro ang responsable nga pagmina, mapanalipdan ang kinaiyahan ug mapalambo ang ilang panginabuhian.
Gipasiugda usab ni Requimin nga kinahanglan mosunod ang mga small-scale mining operators sa tanang lagda ug kondisyon nga gilatid sa kasabotan, ilabina ang mga gidili nga kalihokan nga mahimong makadaot sa kinaiyahan.
Gilauman sa MGB-10 nga pinaagi sa hustong pagdumala, pagbansay ug pagsunod sa mga regulasyon, mahimong mas organisado ug responsable ang pagmina samtang mapanalipdan ang kinaiyahan ug panginabuhian sa mga komunidad.
Photo courtesy: MGB-Region X
