Gisuportahan sa Department of Planning and Development (DEPDEV) Region X ang gilusad nga programa sa Department of Social Welfare and Development (DSWD) Region X ilawom sa KALAHI-CIDSS nga nagtumong sa pagpalig-on sa mga komunidad batok sa nagkadaiyang katalagman ug kalamidad.
Matod ni DEPDEV X Regional Director Mylah Cariño, dako og ikatabang ang programa apan angayan usab nga sigurohon nga mapatuman kini sa ensakto aron mahimong epektibo ug episyente, ilabina nga anaa sa limitasyon ang pundo o panudlanan sa gobyerno.
Gipunting usab ni Cariño nga kinahanglang dunganon ang pagpatuman sa poverty reduction plan ug social protection plan sa matag lokalidad. Sumala pa niya, ang mga kabus ug labing bulnerable nga sektor ang kasagarang grabehong maapektuhan panahon sa kalamidad.
Dugang pa sa opisyal nga ang ilang pag-antos wala ra matapos sa higayon nga adunay kalamidad, tungod kay dakong hagit usab kanila kon unsaon pagbangon ug pagrekober gikan sa kadaot sa ilang mga kabtangan ug panginabuhian.
Photo courtesy: DEPDev Region X – Northern Mindanao
