Nadakpan sa mga otoridad ang giila nga Top 1 Most Wanted Person sa Surigao del Sur ubos sa EMPO, atol sa hiniusang operasyon sa kapulisan niadtong nakalabay nga adlaw sa Barangay San Jose, Bislig City.
Giila ni PCOL Jeffrey Lawrence D. Mauricio, Provincial Director sa Surigao del Sur Police Provincial Office, ang nadakpan nga alyas “Lito,” 58 anyos, minyo, mag-uuma, ug residente sa Sitio Sikahoy, Purok 5, Barangay San Jose, Bislig City.
Gipahigayon ang operasyon pasado alas 8:10 sa buntag, diin nalambigit ang mga personnel sa Hinatuan Municipal Police Station ubos sa pagdumala ni PMAJ Nurlsan T. Muhadalam, ACOP, kauban ang 1301st Maneuver Company, Regional Mobile Force Battalion 13.
Ang pagdakop gipahigayon pinasikad sa Warrant of Arrest alang sa kasong Rape, diin walay bail nga girekomenda, nga gipagawas niadtong June 8, 2007 sa Presiding Judge sa Regional Trial Court, 11th Judicial Region, Branch 29, Bislig City.
Gipahibalo usab sa kapulisan ang nadakpan sa iyang mga katungod ubos sa Konstitusyon ug gidala kini sa Hinatuan Municipal Police Station alang sa hustong dokumentasyon ug disposisyon, sa dili pa iturn-over ngadto sa korte nga nagpagawas sa warrant.
Photo courtesy: SDSPPO
