Posibleng mahurot ang sobra o buffer sa suplay sa kuryente sa Mindanao pag-abot sa 2028, tungod sa padayon nga pagsaka sa panginahanglan sa kuryente samtang wala pa niini malabwan sa dugang nga kapasidad sa mga power plant.
Matud ni NGCP Spokesperson Atty. Cynthia Perez-Alabanza, hinay-hinay nang nagkagamay ang kal-ang tali sa available power supply ug konsumo sa kuryente sa rehiyon.
Matud pa niya, kung magpadayon ang kasamtangang trend, posibleng moparehas na ang power supply ug demand sa Mindanao sa 2028. Tungod niini, mahimong mawala ang buffer nga gikinahanglan aron mapabiling stable ang power grid.
Gipadayag usab ni Alabanza nga sukad Enero, nakasinati na ang Mindanao grid og 17 ka yellow alert ug upat ka red alert tungod sa kakulang sa suplay nga nalambigit sa mga power plant outage.
Gilauman sa opisyal nga mahimong mas conservative pa ang projection sa NGCP ug gihangyo ang ubang ahensya sa gobyerno nga susihon ug i-validate ang mga datos.
Samtang, giingon usab sa NGCP nga susama nga problema ang giatubang sa Luzon, diin limitado usab ang dependable power supply, ilabina sa gabii kung dili na makahatag og kuryente ang mga solar farm.
Photo courtesy: NGCP
