Nagpadayon ang imbestigasyon sa hinungdan ug katibuk-ang damyos sa nahitabong sunog sa Panabo City partikular sa Panabo Night Market sa Barangay New Pandan gabie sa Setyember 25, 2026.
Nadawat ang report sa maong sunog sa mga kawani sa Bureau of fire Protection BFP-Panabo kapin alas-7 na sa gabii ug paspas kining narespondehan sa mga bombero.
Makita sa video nga nagkagulyang ang mga residente aron masalbar ang ilang mga butang sa nahitabong pag-ulbo sa kalayo, makita sab nga apil sa nasunog ang usa ka pharmacy, bakeshop ug selponan.
Samtang subay sa pakigsusi sa Juander radyo news team sa nasangpit nga lugar, unang nadeparahan sa mga tindera ang baga nga aso nga naggikan sa usa ka siradong stall nga ayuhanan og cellphone hantod nga mikuyanap kini sa mga kasikbit nga stall nga naglakip sa usa ka botika, karenderya ug tindahan sa cellphone.
Wala pay opisyal nga pahayag ang mga otoridad sa pagsulat niining balita kung pila ang kinatibuk-ang damyos. Hinuon walay naangol o nakabsan sa kinabuhi atol sa maong panghitabo.
