Giduso ni City Councilor Ralph Yumang, ang usa ka resolusyon nga nag-awhag sa City Health Office nga ipahibalo sa Sangguniang Panlungsod ang datos sa mga insidente sa pinaakan sa bitin ug ang pondo sa anti-venom treatment sa mga ospital sa General Santos City.
Gipasiugda ni Yumang ang panginahanglan niini isip pagpangandam sa umaabot nga El Niño, diin tungod sa init ug uga nga kahimtang, posible nga mangita og mas bugnaw nga dapit ang mga venomous snake ug makasulod sa mga kabalayan.
Pinaagi sa resolusyon, gusto usab masiguro nga adunay igo ug andam nga anti-venom sa siyudad aron matambalan dayon ang mga biktima sa snakebite.
Gihangyo usab ang City Health Office nga mahibaloan ug maipahibalo sa publiko kung asa nga mga ospital ug health facilities adunay anti-venom, aron sa panahon sa emerhensiya, dali nga makapangita og hustong pasilidad ang mga biktima ug ilang pamilya.
