Agad na kumilos ang Cotabato City Police Office o CCPO kaugnay ng umano’y online threat na nakatuon laban sa isang mag-aaral ng Cotabato Light and National High School o COLAND.
Ayon sa CCPO, kaagad silang nakipag-ugnayan sa Regional Anti-Cybercrime Unit upang beripikahin ang naturang impormasyon at matukoy ang account na sinasabing sangkot sa online threat.
Kabilang sa isinasagawang hakbang ng mga awtoridad ang identification at tracing sa account na sangkot, upang matukoy kung sino ang nasa likod ng naturang post o mensahe.
Isinasagawa ito upang matiyak ang kaligtasan ng mga mag-aaral at iba pang miyembro ng school community, gayundin upang malaman kung may sapat na batayan para sa kaukulang aksyon.
Sinabi ng CCPO na isasagawa ang naaangkop na legal na hakbang sakaling mapatunayan ang paglabag sa batas. Patuloy namang hinihikayat ang publiko na maging maingat sa paggamit ng social media, iwasang magpakalat ng hindi beripikadong impormasyon, at agad na iulat sa mga awtoridad ang anumang kahina-hinalang online activity o banta sa seguridad.
