Nisaka ang mga report sa online school threats sa Police Regional Office 12, diin 52 ka insidente ang natala sulod lamang sa pito ka adlaw, gikan Septiyembre 18 hangtod 24, 2026.
Sumala kang PBGEN Alan B. Manibog, Regional Director sa PRO 12, atol sa press conference niadtong Septiyembre 25, 2026 sa PRO 12 Regional Headquarters, mas daghan kini kumpara sa 13 ka insidente nga natala sulod sa 73 ka adlaw, gikan Hulyo 7 hangtod Septiyembre 17.
Samtang, walo ka menor de edad nga ubos sa 14 anyos ang nasangkot sa mga insidente ug giluwas o nakit-an sa kapulisan. Gihatagan sila og intervention ug supervision. Usa usab ka 17-anyos nga estudyante sa Marbel 7 National High School ang naluwas human makit-ang nagdala og pocket knife, diin ang angay nga aksyon ipailalom sa proseso sa DSWD.
Sa laing bahin, tulo na ka indibidwal ang giatubang og criminal complaints. Duha ka estudyante sa Tupi, South Cotabato ang gidakop tungod sa pag-post og mga litrato nga adunay short firearms ug paghimo og online threats, samtang usa ka 19-anyos nga estudyante sa Sultan Kudarat ang gireklamo tungod sa giingong Facebook school threat.
Gipasiugda ni Manibog nga seryoso nilang gitagad ang tanang report sa online threats ug padayon ang monitoring, verification ug pagresponde niini, uban ang pakigtambayayong sa mga eskwelahan, ginikanan ug mga concerned agencies alang sa kaluwasan sa mga estudyante.
