Gipalig-on sa Lokal nga Pangagamhanan sa Compostela ang koordinasyon uban sa TESDA Davao de Oro aron mas mapalapad ang mga oportunidad sa skills training ug trabaho alang sa mga residente.
Gidawat ni Mayor Levi Ebdao ang TESDA Davao de Oro team nga gipangulohan ni Provincial Director Adonis F. Culas, RN., MPM, kauban si Mary Grace F. Subiere, CLGE Focal, ug PESO-CTEC Loreto Doydoy Jr.
Gihisgutan atol sa courtesy call ang pagpalig-on sa Municipal Technical Education and Skills Development Council o MTESDC, nga gitumong aron mas mapaduol sa mga Compostelaño ang mga programa sa skills training, skills development ug employment opportunities.
Matud ni Mayor Ebdao, mas mahimong epektibo ang mga programa kon magtinabangay ang lokal nga panggamhanan ug nagkadaiyang ahensya sa pagplano ug pagpatuman sa mga proyekto.
Pinaagi sa mas lig-on nga pakigtambayayong sa TESDA ug LGU Compostela, gilauman nga mas matubag ang panginahanglan sa mga residente alang sa dugang kahibalo, kahanas, trabaho ug panginabuhi.
