Operational na ang bag-ong gi-inagurahan laboratoryo sa Banana Tissue Culture nga gidumala sa Pagadian City Agriculture nga nahimutang sa Barangay Macasing, Pagadian City ning nakalabayng semana.
Matud ni Jessa A. Banglos Supervisor sa Banana Tissue Culture Laboratory, dugay nang gidamgo sa City Government ang pagbukas sa maong laboratoryo sa tumong nga mapadaghan ang mga saha sa saging nga lakatan isip planting materials aron iapud-apod sa mga mag-uuma. Segun ni Banglos, limitado pa sa pagkakaron ang ilang mga seedlings, mao nga una pa lang kining gipang-apod-apod ngadto sa mga interesadong empleyado sa City Government nga gustong mosulay og tanom.
Gilauman usab nga sa mosunod nga tuig, modaghan na ang ilang produksyon sa seedlings aron mas daghang mag-uuma ug mga interesado ang makapahimulos niini. Matud pa niya, usa usab kini sa mga lakang aron mapalig-on ang banana industry sa Pagadian City, nga nakita usab ni Mayor Sammy Co nga adunay potensyal nga molambo sama sa banana production sa Davao.
Pinaagi sa Banana Tissue Culture Laboratory, gilauman sa City Agriculture Office nga mas mapadaghan ang de-kalidad nga banana planting materials ug mas mapalapad pa ang pagtanom sa saging sa syudad sa Pagadian.
Photo courtesy: Sam Tyra Co fb
