Padayon ang pagdumala sa Municipal Disaster Risk Reduction and Management Office o MDRRMO sa Mawab, Davao de Oro, alang sa pagpanalipod ug pagsiguro sa kaluwasan sa mga residente sa tibuok lungsod.
Gipakusgan sa MDRRMO ang mga lakang sa disaster preparedness, monitoring ug response aron mas maandam ang mga barangay sa posibleng kalamidad ug uban pang emerhensya.
Sumala ni MDRRMO Mawab OIC Head Joseph Jovanny Javier, ang Barangay Tuburan usa sa mga lugar diin kasagarang mahitabo ang mga disgrasya. Tungod niini, gisuportahan ni Mayor Myrill Apit ang plano nga pagbutang og mga CCTV camera sa maong lugar aron mas ma-monitor ang sitwasyon ug matino ang posibleng hinungdan sa mga disgrasya.
Dugang ni Javier, padayon na ang koordinasyon sa mga supplier alang sa pag-instalar sa mga CCTV. Lakip usab sa plano ang pagbutang og mga CCTV camera sa dagkong mga sapa aron mamonitor ang lebel sa tubig, ilabi na panahon sa kusog nga pag-ulan.
Gipasabot nga dili lamang vehicular incidents ang tumong nga mamonitor pinaagi sa mga CCTV, kundili lakip na ang posibleng pagbaha ug uban pang kalamidad nga mahimong mahitabo sa maong mga lugar.-
Giawhag sa MDRRMO ang mga residente nga magpabiling alerto, mosunod sa mga pahimangno sa otoridad ug kanunay nga mangandam aron malikayan ang pagkawala sa kinabuhi ug kadaot sa kabtangan panahon sa emerhensya.
