Kapin sa ₱15 milyon ang Standard Drug Price sa gituohang shabu nga nasakmit sa kapulisan atol sa buy-bust operation sa Butuan City, kaganihang alas 3:14 sa kadlawon, Setyembre 26, 2026.
Gipahigayon ang operasyon sa Beehive Lodge, Purok 1, Barangay Bancasi, Butuan City, nga gipangulohan sa Regional Drug Enforcement Unit 13 o RDEU13/RID13, uban ang DEU sa Butuan City Police Office ug Butuan City Police Station 3.
Tulo ka suspek ang giila sa kapulisan nga High Value Individuals o HVI.
Giila ang mga dinakpan nga sila si Gualberto, 48 anyos, lalaki, minyo, residente sa Purok 5, Brgy. Basilisa, RTR, Agusan del Norte, Danrey 32 anyos, lalaki, adunay live-in partner, residente sa Purok 7, Brgy. Tolosa, Cabadbaran City, ug Rowena, 27 anyos, babaye, walay trabaho, residente sa Brgy. Doongan, Butuan City.
Nasakmit gikan sa operasyon ang 13 ka sachet sa gituohang shabu nga adunay kinatibuk-ang gibug-aton nga 2,252 gramos, nga adunay Standard Drug Price nga ₱15,313,600.
Nakuha usab ang duha ka tinuod nga ₱1,000 bill, 68 ka boodle money, illegal drug paraphernalia ug uban pang non-drug items.
Ang mga suspek anaa na karon sa kustodiya sa kapulisan ug atubangon ang kasong paglapas sa Republic Act 9165 o Comprehensive Dangerous Drugs Act of 2002.
