Luwas na ang kahimtang sa Grade 5 nga batang lalaki nga nabanggaan sa Tricycle samtang mitabok sa pedestrian lane atbang sa Mariano Espina Memorial Central Elementary School (MEMCES) sa Barangay Taft, Surigao City, alas-12:15 sa udto niadtong Setyembre 25.
Kahinumdoman nga makita sa CCTV Footage nga mitabok sa Pedestrian lane ang batang lalaki dihang nabanggan sa tricycle nga adunay body number SC-0704 nga gimaneho sa 45-anyos nga lalaki. Daling gidala sa tambalanan ang biktima alang sa medikasyon.
Sa pakighinabi sa Juander Radyo News Team sa imbestigador, kahibaloan nga nakigsitol na ang drayber ug ang pamilya sa bata. Giklaro ni PCAPT Robert Paredes, nga imbestigahan gihapon sa City Traffic Management Office o CTMO ang tricycle driver nga nakabangga sa menor de edad nga mitabok sa pedestrian lane.
Sumala kang PCAPT Robert Paredez, susihon sa buhatan ang maong insidente ug ang ebidensya, lakip na ang video footage sa maong hitabo.
Matud ni Paredez, depende sa resulta sa imbestigasyon ug sa rekomendasyon, posibleng masuspenso ang driver’s license sa tricycle driver. Susihon usab sa opisyal ang prangkisa sa maong tricycle, ug kung mapamatud-an ang paglapas sa mga regulasyon, posible usab kining maapektuhan, lakip na ang posibilidad nga kuhaan og prangkisa sa siyudad.
Gipahinumdom ang mga motorista nga kung adunay motabok, kinahanglan mohunong o mo-minor aron hatagan sa higayon ang motabok ilabi na sa mga Pedestrian lane.
