Gilunsad na sa lokal nga pangagamhanan sa Manolo Fortich ang Manolo Fortich Citizens’ ID nga adunay debit card function, isip lakang sa digitalization ug pagpalambo sa serbisyo publiko.
Sa esklusibong pakighinabi sa Juander Radyo Malaybalay ngadto kang Shekaina Luiza Abarido Public Relations Assistant Municipal Information Office sa lungsod. Sumala pa niya nga ang LGU Manolo Fortich mao ang unang lokal nga pangagamhanan sa Northern Mindanao nga nagpatuman sa citizen ID nga adunay Visa card function.
Sa unang batch sa distribusyon, giuna ang mga Barangay volunteers aron mas sayon ang pagdawat sa ilang honorarium ug malikayan ang dugang gasto sa pamasahe sa pag-adto sa munisipyo. Dungang pa, niya makatabang ang sistema sa mga volunteers nga dili na mobiyahe gikan sa ilang mga barangay aron lamang makakuha sa ilang honorarium.
Gawas sa personal nga impormasyon sa card, magamit usab kini sa mga digital transaction, nga gitumong sa LGU nga makahatag og mas paspas, sayon ug accessible nga serbisyo sa mga Manolenyo.
Ang paglunsad sa Citizens’ ID kabahin sa 8-point agenda sa LGU, ilabina sa pagpalig-on sa good governance ug digitalization sa serbisyo sa gobyerno.
Photo courtesy:LGU Manolo Fortich
