Patay ang usa ka 33-anyos nga lalaki human pusila sa tulo ka higayon samtang naglakaw ug nag-selphon sa sementadong karsada sa Purok 4, Sitio Pantaron, Barangay Banlag, Valencia City, mga alas 7:00 sa gabii, Setyembre 19, 2026.
Nakaangkon ang biktima og mga samad sa dughan, tiyan, ug paa, ug nadala pa sa iyang mga silingan ngadto sa iyang balay apan didto na kini nabugtoan sa iyang kinabuhi.
Ang Person of Interest karon sa kapulisan ang usa ka alyas “Asutay”, kinsa nasayran nga kanhi live-in partner sa kasamtangang 26-anyos nga kapuyo sa biktima. Tulo ka basiyo sa bala gikan sa wala mailhing armas ang gitugyan sa usa ka saksi ngadto sa mga nagrespondeng opisyal sa Valencia City Police Station (CPS).
Kasamtangang gikasa na sa Valencia CPS ang Oplan Shield ug nagpahigayon na sa hot-pursuit operations alang sa pagdakop sa suspek.
Photo courtesy:Valencia CPS
