Nagpabiling dakong hagit dili lang sa Northern Mindanao apan sa tibuok nasud ang problema sa mga natapnan og rabies virus pinaagi sa paak sa mga hayop.
Sumala pa ni Dr John Daniel Estandarte, Medical Officer III, Infectious Diseases Cluster, sa DOH X nga tuod dili pa ingon ana ka alarming ang kaso sa rabies sa tibuok rehiyon, apan dakong hagit gihapon ang hingpit nga pagpakgang sa makamatay nga sakit.
Tungod niini, gipunting ni Dr Estandarte nga dili lang kini responsibilidad sa health sector apan kinahanganglang mulihok ang tibuok komunidad labi pa nga ang rabies usa ka disease of public health concern ug sagad nga dili matagad.
Dugang pa ni Dr Estandarte nga angayan sab nga ma-edukar ang katawhan mahitungod sa rabies labi na paghatag og kahibalo ug awareness sa mga nagapamuhi og hayop sama sa iro aron nga mahimong mas responsableng pet owner.
Kahibaloang matag Septiyembre 28, ginasaulog ang World Rabies Day aron nga mahimong pahinumdom sa tanan nga ang rabies makamatay apan kaya rang malikayan pinaagi sa pagtinabangay sa tanan.
Photo courtesy: DOH X
