Giklaro sa Maramag Municipal Police Station mga dili ang pagpangulata sa mga classmate maoy hinungdan sa pagkamatay sa usa ka 10-anyos nga bata nga lalaki sa Barangay Bayabason, Maramag, Bukidnon. Kini human nag-viral sa social media ang balita bahin sa giingong pagkulata sa bata.
Base sa opisyal nga Death Certificate gikan sa Bukidnon Provincial Hospital (BPH) – Maramag, ang kamatuoran sa pagkamatay sa bata mao ang pagdugo sulod sa utok tungod sa hilabihang pagkaubos sa iyang platelet count, nga gisundan usab sa grabeng pneumonia.
Gipasabot sa mga awtoridad nga bisan man tuod og adunay nahitabong gamay nga lalis o panag-away sa mga bata sa eskwelahan niadtong Agosto 26, 2026, diin Setyembre 2, 2026 na gidala ug na-admit sa ospital ang bata—usa ka semana pagkahuman sa maong panag-away.
Tungod sa taas nga gintang sa adlaw ug sa mga resulta sa medikal nga dokumento, walay direktang kalambigitan ang nahitabong away sa tunghaan sa kritikal nga kahimtang ug pagkamatay sa maong menor de edad. Tungod niini, nanawagan ang kapulisan sa publiko nga likayan ang pagpakatap sa mga balitang walay beripikasyon aron dili na makadugang sa kasubo sa pamilya.
Photo courtesy: Maramag Municipal Police Station
