Maghatag ang lokal nga panggobyerno sa Impasug-ong og tulo ka bulan nga libreng maintenance nga tambal alang sa mga residente nga adunay regular nga maintenance, lakip ang mga nag-antos sa high blood, diabetes, ug mga sakit sa mental health.
Gitin-aw ni Mayor Mai Okinlay nga tambal mismo ang ilang ipang-apod-apod ug dili cash assistance, diin gamiton sa Municipal Health Office, Rural Health Units, ug mga barangay ang ilang opisyal nga listahan alang sa mahimong profiling ug pag-ila sa mga kwalipikadong pasyente.
Ipang-apod-apod ang mga tambal sa tagsa-tagsa ka barangay ug magpahigayon usab sila og house-to-house delivery alang sa mga residente nga dili makatambong sa gitakdang adlaw sa distribusyon.
Isip kabahin sa ilang Annual Investment Plan sa sunod tuig, giplano usab sa LGU ang pagbutang og mobile pharmacy aron mas mapalapad, mapadali, ug mas mapaduol pa ang paghatag og libreng tambal sa matag suok sa lungsod
Photo courtesy: Mai Okinlay/FB
