Upat ka mga tawo ang namatay ug 22 ang nasamdan sa Japan human miigo ang Bagyong Dujuan sa nasod. Kapin 45,000 ka panimalay sa Chiba, duol sa Tokyo, ang wala gihapoy kuryente niadtong Martes sa hapon, samtang kapin 460 ka balay ang nadaot.
Mibiya na sa baybayon sa Japan ang bagyo ug mipadulong sa Pacific Ocean, hinungdan nga gibawi o gipaubos sa mga awtoridad ang kadaghanan sa mga pahimangno batok sa kusog nga ulan ug landslide. Ang Fire and Disaster Management Agency miingon nga tulo ang namatay sa Chiba ug usa sa Kanagawa.
Nagpadayon usab ang pagpangita sa unom ka tawo nga gikatahong nawala human sa mga landslide nga gipahinabo sa kusog nga ulan. Sa Oshima, mga 120 kilometro sa habagatan sa sentro sa Tokyo, miabot sa 832 millimetro ang ulan sulod sa 48 oras.
Bisan mihuyang na ang Dujuan samtang mibalhin paamihanan-sidlakan, nakapahinabo kini og record nga pag-ulan sa pipila ka bahin sa Tokyo. Sa Edogawa Ward, Tokyo, miabot sa rekord nga 282.5 millimetro ang ulan sulod sa 24 oras.
Photo courtesy: South China Morning Post
