Unom ka mga suspek nga nalambigit sa pagbaligya og illegal nga droga ang nadakpan sa managlahing buy-bust operation sa Surigao del Norte. Nanguna sa operasyon ang mga Pilar Municipal Police Station, 1st SDN Provincial Mobile Force Company, PDEA Regional Office 13, ug Regional Intelligence Unit 13 Surigao del Norte.
Matud ni Police Colonel Warren E. Dablo, Provincial Director sa Surigao del Norte Police Provincial Office, ang mga nadakpan nga unom ka street-level drug suspects nga gi-monitor sa kapulisan sa nagkalain-laing lugar sa probinsya. Lakip sa mga nadakpan ang upat ka drug suspek sa Surigao City, usa ka sa Barangay Catangnan, General Luna, ug usa sa Barangay Rizal, Socorro.
Nasakmit gikan sa operasyon ang 17 ka sachet sa gituohang shabu nga adunay kinatibuk-ang gibug-aton nga 2.1543 gramos ug standard drug value nga kapin P14,649.24. Narekober usab ang duha ka 1,000-pesos nga marked money, duha ka cellphone, usa ka pakete sa sigarilyo ug nagkalain-laing drug paraphernalia.
Ang unom ka suspek giingong nadakpan human makit-ang namaligya og illegal nga droga, nga giingong paglapas sa Section 5, Article II sa Republic Act 9165 o Comprehensive Dangerous Drugs Act of 2002.
Ang mga suspek ug mga ebidensyang nakumpiska anaa na sa kustodiya sa Police Station alang sa hustong disposisyon.
