Opisyal nga ipahigayon sa Municipal Tourism Office sa Manolo Fortich ang pag-abli sa pinakaunang Municipal Museum sa lungsod atol sa pagsaulog sa ika-4 nga Municipal Tourism Week karong Septiyembre 29 hangtod 30, 2026.
Sumala ni Municipal Tourism Officer Jixon Cloyd R. Abanes, himuon ang soft opening sa maong pasilidad sa Old Municipal Building, diin ipasundayag ang mga ginama sa Bukidnon Local Artists Collective—sama sa soil painting, acrylic painting, ug sculpture—kauban ang mga karaang litrato nga nagpakita sa kasaysayan sa lungsod.
Ang maong duha ka adlaw nga kalihokan lakip usab sa localized nga pagsaulog sa National Tourism Month nga pagatambongan sa nagkalain-laing aktibidad sama sa ribbon-cutting, art exhibit, soil painting workshop, Ta-Manolo Fortich Cookfest, ug ang Balik Tanaw Media Exhibit.
Magsilbi usab nga highlight sa ikaduhang adlaw sa selebrasyon ang usa ka forum alang sa mga tag-iya sa hotel ug restawran sa lungsod, nga pagasundan sa Tourism Awards Night sa alas 4 sa hapon alang sa paghatag og pag-ila sa mga nag-unang mupo-unlad sa turismo.
Aron mas mapalig-on ang maong proyekto, naghangyo ang Tourism Office sa pakig-alayon sa publiko nga motampo sa ilang Heritage Collection Drive pinaagi sa pagdonar o pagpahulam og mga karaang gamit ug makasaysayanong litrato aron mahimong kabahin sa permanente ug opisyal nga koleksiyon sa museum.
Photo Courtesy:Manolo Fortich Tourism
