Sikop sa mga awtoridad ang duha ka lalaki human giingong nasakpan nga nangawat og diesel fuel sa usa ka poultry farm sa Barangay Anonang, Midsayap, Cotabato, niadtong Setyembre 15, 2026. Base sa report sa Midsayap MPS, mga alas-10 sa gabii dihang nadakpan matod pa sa mga empleyado sa poultry farm ang duha ka suspek samtang nagpasuyop og diesel gikan sa tangke sa backhoe nga gigamit sa maong lugar.
Giila sa kapulisan ang mga suspek nga sila si “Alyas Gel,” 28-anyos, ug “Alyas Nel,” 21-anyos. Human niini, gilunsad dayon sa Midsayap MPS ang hot pursuit operation nga mitultol sa ilang pagkadakop. Narekober gikan kanila ang usa ka plastic gallon nga adunay gibana-banang walo ka litro nga diesel, usa ka bakanteng gallon, ug mga upat ka metros nga nylon hose.
Gidala sila sa ospital alang sa medical examination ug dayon gi-custodial detention, samtang giandam ang kaso nga Qualified Theft ubos sa Article 310 sa Revised Penal Code.
Photo Courtesy: Midsayap MPS
