Gipakusgan sa Police Regional Office 11 ang ilang kampanya batok sa nagkalainlaing matang sa krimen, nga miresulta sa pagkasakmit sa kapin ₱1.6 milyon nga kantidad sa gidudahang ilegal nga droga sulod sa 24 oras nga operasyon.
Base sa report, gikan alas 6:00 sa buntag niadtong Nobyembre 4 hangtod alas 5:59 sa buntag sa Nobyembre 5, 2026, nakapahigayon ang kapulisan og 12 ka operasyon batok sa ilegal nga droga. Miresulta kini sa pagkasikop sa 17 ka indibidwal ug pagkasakmit sa 243.69 gramos nga gidudahang shabu, 6.18 gramos nga marijuana ug tulo ka tanom sa marijuana, nga adunay kinatibuk-ang standard drug price nga mokabat sa ₱1,658,365.60.
Samtang, nakapahigayon usab ang kapulisan og 13 ka operasyon batok sa mga wanted person, diin lima ang nasikop sa regional ug provincial level, tulo sa municipal level, ug lima ka laing wanted person.
Lakip usab sa gipakusgang kampanya sa PRO 11 ang pagsumpo sa loose firearms, ilegal nga sugal, ilegal nga pagpangisda, paglapas sa mga ordinansa sa munisipyo ug smuggling.
Photo courtesy: PRO 11
